مالا هه لبه ستان

 دێ و باڤ

Dê û bav

 

دیێک و باڤه‌ک و خوانگ و برا بوون

ژه  خه‌لکی  دل وه ئه‌رمانێ  ڤرا بوون

Diyêk û bavek û xweng û bira bûn

Je xelkî dil we ermanê vira bûn

دێ و باڤه‌ک ژه ناڤ کوردێن کری  بار

ژه کوردێن  هاتێ  ژه  ئورتا  چیێن سار

Dê û bavek je nav kurdên kirê bar

Je kurdên hatê je urta çiyê sar

ژه کوردێن کوچه‌ر و گه‌ریایی له واران

 بریندارێن    ته‌مامێ   روزگاران

Je kurdên kûçer û geryay le waran

Birîndarên temamî rûzigaran

دێ  و باڤێ   نه‌دی غیر از تالاشێ

دێ و باڤێ  نه‌دی  ره‌نگی  مه‌عاشێ

Dê û bavê nedî xeyre talaşê

Dê û bavê nedî rengê me'aşê

ژه رندێ بی وه‌لات و دل  وه‌ئه‌رمان

کو دلخواشن، له گشتێ سار و گه‌رمان

Je rindê bê welat û dil we erman 

ku dilxwaş in ,le giştê sar û german

دێ و باڤه‌ک  نه‌خواندێ  وه سه‌واتوون

مینا   خه‌طێ  نڤیسی   بی ده‌واتوون

Dê û bavek nexwendê we sewad bûn

Mîna xetê nefîsê bê dewat bûn

مینا خیله‌ک ژه دێ باڤێن  ڤرا بوون

له وه‌ختێ  ته‌نگیان جووته‌ک برا بوون

Mîna xêlk je dê bavên vira bûn

Le wextê tengiyan cûtek bira bûn

دێ و باڤه‌ک نه‌چوویی ده‌رسێ و زانا

نه  مینا  پر  ژه   ڤان   ژار  و  ڤزانا؛

Dê û bavek neçûy dersê û zana

Ne mîna pir je wan jar û vizana

(که‌سێن  کو جانی  خوه  دانه  خزینه

 وه‌لی   ناڤ  و  زمانێ   وان  دزینه

( kesên ku canî xwe dane xizîne

velî nav û zimanê wan dizîne

نه مینا  تاجرێن  دێ باڤ  فریتێ

ژه بیرا  خوه برێ  شیرێ  کو میتێ

ne mîna tacirên dê bav firîtê

je bîra xwe birê şîrê ku mîtê

که‌سێن کو شیری که‌ریێ  خوه ده‌دووشن

دده‌ن   له   بیریێ   خه‌لکێ   ده فروشن!)

kesên ku şîrî keriyê xwe dedûşin

deden le bîriyê xelkê defiroşin)

به‌لێ، دێ باڤه‌کی، پاک  و  وه ئینصاف

دو  کورده  ساده  و دلبێش  و  دلصاف

Belê ,dê bavekî ,pak û we insaf

Du kurde sade û dilbêş û dilsaf

ژه قومری و که‌ڤووتان پرسی بوون  ده‌رس

ژه کیڤیان و  گولان هیڤووسی بوون  ده‌رس

Je qumrî û kevûtan pirsî bûn ders

Je kîviyan û gulan hêvosî bûn ders

له پای ده‌رسێ  داری  مه‌رخێ  رونشتێ 

وه گولیێ  وێ خه‌طی خوارێ خوه، مشتێ

Le pay dersê darî merxê rûniştê

We golyê wê xetê xwarê xwe miştê

وه ئاڤێ  کانیان  شووشتێ دلی خوه

له  سینگی  تاڤی  دانێ  حاصلی  خوه

We avî kaniyan şûştê dilî xwe

Le sîngî tavê danî hasilê xwe

وه شه‌لپێ  چیره‌م  و شیلان و چووکێ

دخه‌ملاندن  خوه،  وێ  زاڤا  و  بووکێ

we şelpey çîrem û şîlan û çûkê

Dexemlandin xwe ,wê zava û bûkê

کتاوا مستێ  وان  بێل  و  کولنگ  بوو

قه‌لم، له ده‌ستێ وان شێڤ یا ئیزنگ بوو

Kitawê mistî wan bîl û kuling bû

Qelem ,le destî wan şiv û êzing bû

توروه پشتێ  تژێ  گول یا گیان  بوو

له سفرێ،  نان و  پوونگا  ناڤ چیان بوو

Torwepiştê tijê gul ya giyan bû

Le sifrê ,nan û pûnga nav çiyan bû

ژه جووشێ ئانخ و هه‌فشان و هووشێ

کتاو سه‌ریز ده‌بوون  ژه  ناڤ  برووشێ

Je cûşê anix û hefşan û hûşê

Kitaw serrêz debûn je nav birûşê

(بوئژم؛ ئه‌ز ‌ژی زانینێ  ده‌خوازم

ناخوازم   وه  نه‌خوانده‌تیێ  بنازم

( biwêjim;  ez jî zanînê dexwazim

naxwazim we nexwandetiyê binazim

سه‌وا مه، نینێ شه‌نه‌ک بی سه‌واتێ

چقه‌س   بی مه‌زه یێ   مێژویی  نه‌پاتێ

sewa me nîne şenek bê sewadê

çiqes bê meze ye mêjoyê nepatê

نه خوشحالم کو وان مه‌له نه‌دی  بوون

وه‌لی  بێ مه‌له ژی، ژیر و که‌دی بوون

ne xwoşhal im ku wan mele nedî bûn

welî bê mele jî ,jîr û kedî bûn

ئه‌گه‌ر ده‌رده‌ک وه ناڤ دل دا نه‌وینی

چ  فایده عومره‌کێ  ده‌رسێ  بخوینی

eger derdek we nav dil da newînî

çi fayde umrekê dersê bixwînî

ده‌می زانین نه‌ره ناڤ خوین و هێستێ

له  بن   باری  کتاوان   که‌ر  ده‌وه‌ستێ!

demî zanîn nere nav xwîn û hêstê

le bin barî kitawan ker dewestê!

که‌سی  ژه قچکی  بێ ئار و خێره

ئه‌گه‌ر دونیێ  بکێ  مستێ، فه‌قێره

kesî je qiçiktê bê ar û xêr e

eger dunyê bikê mistê ,fexêr e

که‌سی ئاره‌ک وه ناڤ دل دا تونینێ

وه  چ   دلگه‌رمیێ   زنده   ده‌مینێ

kesê arek we nav dil da tunînê

we çi dil germiyê zinde demînê

سه‌وات و عشق  و آزاتێ  چرا نه

له ناڤان سێ که‌سن، هه‌ر سێ  برا نه

sewad û işq û azadê bira ne

le navan sê kes in ,her sê bira ne

چ  فایده  وه سه‌وات و دل وه ترسی

جارێ  ویره‌ی نه‌کی  تشته‌ک  بپرسی؟

çi fayde we sewad û dil we tirs î

carê wîrey nekê tiştek bipirsî ?

چ  فایده   ئاده‌می  زانا  و   بێ ده‌رد

کو ژه ده‌دری دلان، لێ روونه‌نی گه‌رد!

çi fayde ademî zana û bê derd

ku je derdî dilan ,lê rûnenî gerd!

م دینه، که‌چکێنه مه‌یته‌و نه‌شاندێ

کو پر ژیرن ژه لاوکێن  ده‌رس‌خواندێ!

 

Me dîne ,keçkêne meytew neşandê

Ku pir jîr in je lawykên ders xwandê

نه‌هشتن  ئه‌ز  ژه جیناره‌ک  بترسم

نه‌خواستن  ئه‌ز  ژه بنداره‌ک  بترسم!

Nehiştin ez je cînarek bitirsim

Nexwastin ez je bindarek bitirsim

ئه‌ڤینه‌ک بوو، دله‌ک خواش و کرن حه‌ز

کو وان دانه من و دارا کرم  ئه‌ز

Evînek bû ,dilek xwaş û kirin hez

Ku wan dane min û dara kirim ez

نه مستا باڤی من تژێ دراڤ بوو

نه سفرا دایکێ من  بی نان وئاڤ بوو

Ne mista bavî min tijê dirav bû

Ne sifra daykê min bê nan û av bû

ئه‌گه‌ر ساله‌ک شڤان، ساله‌ک له کئر بوون

وه  سه‌ختێ  ئانین  و زکێن  مه  تێر بوون

Eger salek şivan, salek le kêr bûn

We sextê anîn û zikê me têr bûn

سپاسا من ژه دێ باڤێن منی قاش

فه‌قیر و بێ دراڤ، ئه‌ما زمانخواش

Spasa min je dê bavên minî qaş

Fexîr û bê dirav ,ema zimanxwaş

سپاسێ  من ژه وان  نه  ‌سا درێڤه

نه  سا  برچی  نه‌مان و نین و ئێڤه

Spasê min je wan ne sa dirêv e

Ne sa birçî neman û nîn û êv e

سپاس و ده‌وله‌تا  من  عشق  و حاله

که‌سی بێ عشق و حاله، ده‌ست ئه‌تاله

Spas û dewleta min işq û hal e

Kesê bê işq û hal e ,dest etal e

ده‌ما کو ئه‌زخزان بووم وان عازیزان

له  دورا   من  مینا  عاشق بلیزان

Dema ku ez xizan bûm wan azîzan

Le dora min mîna Aşiqbilîzan

ده‌گه‌ریان  و هه‌میشه پشت ده‌دان من

وه که‌نی خواشێ خوه، هه‌رتشت ده‌دان من

Degryan û hemîşe pişt dedan min

We kenî xwaşê xwe ,her tişt dedan min

ئه‌گر چ  وه برین و دل  وه ژان  بوون

له سه‌ر لێڤان  شه‌ڤارو «لاوو جان» بوون

Egerçi we birîn û dil we jan bûn

Le ser lêvan şev a ro "lawo can" bûn

وه ده‌نگێ خواش سه‌وا دلخواشیا من

وه  کورمانجی  دلوراندم  دیا من

We dengê xwaş sewa dilxweşiya min

We kurmancî delorandim diya min

 وێ کاره‌ک کر کو ئه‌ز کوور بوم له سه‌ر خوه

بهیڤووسم  هه‌زار  ده‌رسێ  ژه  به‌ر خوه

Wê karek kir ku ez kûr bim le ser xwe

Bihêvosim hezar dersê je ber xwe

وێ  دامن ژه زمانێ  خوه  خه‌لاته‌ک

کو ئالش نا که‌رم  ئه‌ز  وه  وه‌لاته‌ک!

Wê da min je zimanî xwe xelatek

ku aliş nakerim ez we welatek

وێ دا من شیرێ کورمانجێ  چیاچی

نه‌کر جارێ  په‌ر و باسکێ  م  قاچی

Wê da min şîrê kurmancê çiyaçî

Nekir carê  per û baskê mi qaçî

وێ ئه‌ز لوراندم و خوینا م  گه‌رم بوو

 دلێ  که‌ڤران  ژی ژه ده‌نگێ وێ نه‌رم بوو

Wê ez lorandim û xwîna mi germ bû

Dilî keviran jî je dengê wê nerm bû

دیا من سا مه را عومره‌ک هه‌ڤال  بوو

هه‌ڤاله‌ک بوو کو  بێ منه‌ت  له مال بوو

Diya min sa mi ra umrek heval bû

Hevalek bû ku bê minet le mal bû

م   ژه  باڤی خوه گه‌په‌ک سار، جارێ

نه‌بیست،  وه تو  ده‌لیل  و سا تو کارێ

Mi je bavî xwe gepek sar ,carê

Nebihîst ,we tu delîl û sa tu karê

ئه‌گه‌ر چ   باڤی مه  هین  بی سه‌واته

وه‌لی  سار گه‌پ کرن   ساوی  قه‌واته

Egerçi bavî me hîn bê sewad e

Welî sar gep kirin sa wî qewat e

وه‌قه‌س ئه‌و  وه دلێ   ڤی شاعرا یه

کو ئه‌ز  فام ناکه‌م ئه‌و باڤ یا برا یه!

Weqes ew we dilê vî şaêra ye

Ku ez fam nakeme ew bav ya bira ye

نه‌دانا من ئه‌گه‌ر وان  ڤا  زمانا

دلێ  من خوین ده‌بوو ژه ڤێ  زه‌مانا

Nedana min eger wan va zimana

Dilê min xwîn debû je wî zimana

خادێ جان، داگری وان هه‌ر دو یاران

شه‌مال  خا ڤێ   نه‌که  ئاری  له  واران

Xwadê can ,dagirî wan her du yaran

Şemal xavê neke arî tu waran

بهیل ئه‌و هین  له  سه‌ر لنگان  بمینن

مینا   مه‌رخان  له  سه‌ر چنگان  بمینن!

Bihêl ew hîn le ser lingan bimînin

 !Mîna merxan le ser çingan bimînin